வலசை

முதன் முறை என்ற போதிலும்
வானில் வழித்தடம்
நினைவில் வைத்துள்ளது பறவை
#
தன் படகை
அலகில் சுமக்கிறாய்
பல்லாயிரம் மைல்கள்
மலைகளை கடக்கிறாய்
தன் வம்சம் தளைக்க
கண்டம் தாண்டுகிறாய்
உன் சின்னஞ்சிறு
உடலிலிருந்து
எத்தனை பெரிய
விந்தைகளை உதிர்க்கிறாய்
உண்மையில் இது என்ன
#
வீட்டு மாடியில்
போட்டதை தின்று
முட்டை இடும் நாட்டு கோழியே
எதிர் வீட்டு மொட்டை சுவரில்
சோறுண்ண வருகை தரும்
நூறாண்டு கண்ட காகமே
பக்கத்து தெரு வேப்பமர
நிழலில் தரை இறங்கும்
சிட்டுக்குருவிகளே
நீங்கள் எல்லாம் யார்
இவனை சுற்றி
உங்கள் வாழ்வு சலிப்பதென்ன
#
பயணிக்கும் இடம் எல்லாம்
பறவை தேடும் மனம்
வாய்த்து விட்டால்
அதை விட
வேறு என்ன வேண்டும்
நற்பேறு
#
ஒருமுறை
சமண குகை தேடிச் சென்று
தன்னை பறவை யென்றெண்ணி
சிகரம் நீத்து கை சிறகு விரித்து
வான் வெளி ஏகினான்
நல் வாய்ப்பாக அதுவும்
ஒரு பறவையின் கனவென்றானதால்
உயிர் மிஞ்சினான்
#
பறவையின் கனவு
பறத்தலை தவிர
வேறு என்னவாக இருக்கும்
அவ்வாறு எனில்
நடமாடி திரியும் இவன்
எப் பறவையின் கனவு
#
ஜூலை 13, 2021
முன்னிரவு

Published by ஹவி

கவிஞன்/வாசகன் # 1970 ஆம் ஆண்டு பிறந்த இவரது இயற்பெயர் ஹரிக்குமார். ஹவி, போதிபாலன் என்ற பெயரில் தொண்ணூறுகள் தொடங்கி, கடந்த முப்பதாண்டுகளாக கவிதை, கதை, கட்டுரை எழுதிவருகிறார். கணையாழி தொடங்கி இன்றைய நவீன இணைய இதழ்கள் வரை இவரது படைப்புகள் தொடர்ந்து வெளிவந்து கொண்டிருக்கின்றன. அப்பா - சுப்பிரமணியன், அம்மா – லட்சுமி. மனைவி – இந்திராகாந்தி. இடறல், தொரட்டி, புதியதடம் ஆகிய இலக்கிய இதழ்களின் ஆசிரியர் குழுவில் இடம்பெற்றிருந்தவர். புதிய காற்று மாத இதழ் மற்றும் மாலை முரசு, தின மலர், தினகரன், தின மணி ஆகிய நாளேடுகளில் முதுநிலை உதவி ஆசிரியராக பணியாற்றி உள்ளார். `இசைக்குமிழி` என்ற இவரது முதல் கவிதைத் தொகுப்புக்கு, 2011ஆம் ஆண்டின், நெய்தல் அமைப்பின் ராஜமார்த்தாண்டன் விருது வழங்கப்பட்டது. இவரது இரண்டாவது கவிதைத் தொகுப்பாக "முடிவற்ற கோடை" 2021 இல் வெளிவந்துள்ளது. மாரி. மகேந்திரன் இயக்கத்தில் இவரது ஒளிப்பதிவில் வெளியான "அறையின் தனிமை" என்ற குறும்படம் கடந்த 2006 இல் திருப்பூர் அரிமா சுதாமா கோபால கிருஷ்ணன் விருது பெற்றது.

Leave a comment